Nakatanggap po ako ng subpoena mula sa city prosecutor’s office. Wala pa po akong nakukuhang abogado kaya hindi ko po alam ang gagawin ko. Makukulong po ba kaagad ako? —Rhen
Dear Rhen,
Ang subpoena, kapag ang pinag-uusapan ay mga kriminal na kaso, ay ipinadadala ng nag-iimbestigang piskal sa respondent ng isang criminal complaint bilang bahagi ng preliminary investigation. Kung babasahin mo ang nakasulat sa subpoena na ipinadala sa iyo, nakalagay na kailangang magsumite ka ng iyong counter-affidavit kung saan maari mong pabulaanan ang krimeng iniaakusa sa iyo. Kailangan mo ring isumite kasama ng counter-affidavit ang mga dokumento at iba pang mga ebidensiya na susuporta sa iyong depensa.
Ipapayo ko sa iyo na kumuha ka na kaagad ng abogado na pag-aaralan ang iyong kaso. Sa preliminary investigation kasi titingnan ng fiscal kung may sapat bang dahilan upang ituloy sa korte ang paglilitis sa kaso. Kung hindi ka makapagpasa sa takdang araw ng iyong counter-affidavit o kung makapagpasa ka man ngunit nakita ng piskal na may sapat na ebidensiya ang inirereklamong krimen sa iyo ay iaakyat na niya ang reklamo sa korte upang masimulan na ang paglilitis sa iyo.
Hindi ka naman kaagad makukulong sa ngayon dahil katulad ng nabanggit ko, pag-aaralan muna ng fiscal kung may sapat bang ebidensya ang nagrereklamo sa iyo. Titimbangin din niya ang anumang depensa na ilalatag mo at saka lamang siya magdedesisyon kung aakyat ba ang kaso sa husgado. Kung iniakyat niya ang kaso ay saka ka lamang maaring maisyuhan ng warrant of arrest ng korte upang ikaw ay ipaaresto at ipakulong." - https://www.affordablecebu.com/
